Kandidati për kryeministër nga LVV, Albin Kurti ka mbajtur tubimin e radhës në Ferizaj ku u prit nga qindra qytetar në sheshin “Adem Jashari”.

Mes brohoritjeve të shumta mbështetëse, fjalën e mori kryeministri aktual, Albin Kurti, i cili theksoi se pikat ku do të koncentrohet qeverisja e re e drejtuar prej tij nga 9 shkurt, transmeton Arbresh.info.

“1 miliard për prodhimtarinë dhe 1 miliardë për ushtrinë. E kemi gjetur raporti eksport import 1:9 e kemi bërë 1:6 por duhet ta bëjmë edhe me më mirë se 1:6, 1:5, 1:3, 1:2, 1:1 dhe 2:1, edhe më shumë të eksportojmë. Ndërkaq kemi investuar 600 milionë në siguri duke blerë sisteme armatimi anti-tank Javelin, drone Bajraktar dhe helikopterë Black Haëk, kemi filluar fabrikën e municionit dhe do të investojmë 1 miliardë në sigurinë tonë”, tha Kurti.

Kurti u ndal edhe te projektet që lidhen me Ferizajn, ngrohtoren dhe spitalin e qytetit.

“Ferizajin do ta bëjmë me ngrohtore të re të qytetit sepse është ngrohtë në tubimet tona por duhet ta kemi ngrohtë edhe nëpër banesat tuaja edhe nëpër shtëpitë e juaja. Do të vazhdojnë investimet në eficiencë të energjisë, për familjet që kanë nevojë për përkrahje për të izoluar shtëpitë e tyre e për të siguruar kushte më të mira për nxënësit, pacientët, sportistët, e zyrtarët në ndërtesa publike si shkolla, spitale e salla sporti. Kësisoj sigurojmë kushte më të mira jetese për qytetarët, ngrohje me çmime të përballueshme, e lehtësim të ngarkesës në rrjetin elektro energjetik”, tha Kurti

“Ferizajin do ta bëjmë me spital të qytetit. Projekti i spitalit që e kemi gjetur ka qenë i dobët, rrezikshëm i dobët, objekti që është ngritur nuk i plotëson as kriteret minimale të stabilitetit e të izolimit, ai përveç se ka rrezikuar që të bëhet një vend i ndonjë fatkeqësie të madhe për shkak të stabilitetit të ulët, izolimit që ishte paraparë për objektin e spitalit do të dëmtonte menjëherë pajisjet mjekësore milionëshe të cilat do të vendoseshin aty. Me qeverinë tonë të re spitali i ri do të jetë i sigurtë dhe në shërbim të të gjithëve në rajonin e Ferizajt përtej komunës këtu. Spitali do të kushtojë gati 28 milionë euro, buxhetin e kemi siguruar, punimet fillojnë sivjet, Ferizaji do ta ketë spitalin më modern në Republikën e Kosovës. Përveç spitalit në Ferizaj do ta ketë edhe Qendrën e re të Mjekësisë Familjare ku punimet po vazhdojnë dhe ku qeveria jonë po investon më shumë se 2.2 milionë euro. Çdo qytetarë i Ferizajt do ta ketë mjekun e vet familjarë”, shtoi tutje ai.

Tutje, kryeministri foli për planet që qeveria ka për shtimin e punësimit në vend.

“Në Kosovë do t’i ndërtojmë edhe gjashtë poliklinika specialistike të reja në Drenas, në Sharr, në Podujevë, në Viti, në Rahovec, dhe në Leposaviq. Po ashtu do të themelojmë Fondin e Sigurimeve Shoqërore për mbulim të pagesës për pushimin e lehonisë dhe atë prindëror e po ashtu në rast të humbjes së vendit të punës që të kemi një rrjetë sociale pë rata të cilët kanë pasë një fatëkeqësi të tillë pra të mos bien nën pragun e varfërisë pse e humbën vendin e punës. Të dashur qytetarë ne do të krijojmë shumë vende të reja të punës, shumë do të punojmë që do të thotë do të na duhen edhe më shumë punëtorë, që do të thotë do të na duhen punëtorë cilësorë. 22.5% është shtuar prej 350 mijë në 430 mijë punësimi në Kosovë për vetëm katër vjet”, tha Kurti.

“Ne e kemi nivelin e lartë të përgjegjësisë shtetërore dhe besimin e madh popullor. Prandaj edhe rruga jonë është e drejtë dhe ajo çfarë duam ne është mbështetja krejt e kjo krejt mbështetje e ka një numër 118 në fletvotim e 500 mijë në kutia”, tha në fund Kurti./Arbresh.info
Në fund, Kryeministri prezantoi kandidatët për deputetë: ministrin e Financave, Hekuran Muratin, Shqipe Metaj Isufi, Dimal Basha, Valon Ramadani, Adelina Grainca, kandidati Vigan Qorolli, Arbresha Meha, Enver Haliti, Alban Bajrami, Brunilda Gjura, Milazim Salihaj, Mirsad Shkreta, Jeton Raka, Basri Hyseni, Fatbardha Zogaj-Reka.

“Të dashur qytetarë e keni parë se çka po thotë partia e këtij kryetarit të komunës, po thotë: “ma mirë”. “ka ma mirë”, a bënë ma mirë a nuk e di…Tash, shumë gjëra janë bërë, shumë të tjera kanë nisur, që të gjitha të mira me qeverinë tonë e tuaj të mirë. E nëse dikush mendon se Kosova “mundet ma mirë” – ne i themi po – jo që mundet më mirë po mundet shumë më mirë, mundet pakrahasimisht më mirë sesa kur keni qenë ju dikur. E në anën tjetër populli e ka një shprehje të mirë, thotë: “e mira s’ka skej” mirëpo me mandatin tonë të ri, e me Kosovën cep më cep me sovranitet e integritet edhe “skejen” e të mirës kemi me e pa, edhe të mirës skajin kemi për t’ia parë”, tha Kryeministri Albin Kurti.